A Plataforma Galega en Defensa do Ensino Público remitiulle este xoves 3 de abril unha carta ao conselleiro de Educación para expresarlle a súa preocupación pola implantación da LOMCE en Galiza e as repercusións negativas que pode ter na calidade do ensino no noso país e na formación do noso alumnado. A Plataforma reclamámoslle que non se impoña, unha vez máis, a improvisación e que non se aplique a LOMCE para o curso 2014-2015.
Reproducimos os escritos presentados:
Sr. Conselleiro:
A Plataforma Galega en Defensa do Ensino Público acordou remitirlle
esta carta para expresarlle a súa preocupación pola implantación da LOMCE en
Galiza e as repercusións negativas que pode ter na calidade do ensino no noso
país e na formación do noso alumnado.
Unha das primeiras medidas que nos vai afectar é a implantación dos libros
de texto, xa que a modificación dos currículos e, por tanto, dos contidos
destes materiais terá unha repercusión negativa na calidade do ensino e na
formación do alumnado, pois son uns currículos que non teñen en conta a nosa
realidade ou deturpan a nosa historia. Exemplo disto son os currículos de
Historia e de Arte que non recollen con fidelidade a nosa realidade histórica e
artística, nin a importancia de Galiza na Historia e na Arte. Este feito preocúpanos
e lévanos a dirixinos a vostede, como máxima autoridade educativa en Galiza,
para reclamarlle que non se implanten novos libros de texto en Galiza.
Esta petición tamén se sustenta na urxencia perentoria de evitar o incremento
do gasto das familias, hoxe por hoxe con serias limitacións económicas que lles
impiden facer fronte aos gastos dos libros de texto, máxime cando a súa substitución
se fai en curtos períodos de tempo, como se vai facer nesta caso, antes de que
remate a vixencia dos actuais. Por iso insistimos na importancia de que non se
aplique esta medida no vindeiro curso e que, de vez, se restitúa a total
gratuidade dos libros de texto para todo
o alumnado de educación infantil, primaria e ESO.
Como parte da comunidade educativa preocúpanos tamén a modificación
curricular que suporá a LOMCE por diversas razóns. Materias que consideramos
esencias na formación do alumnado como é a Educación Artística deixarán
de ser materia obrigatoria para todo o alumnado. Esta modificación dará lugar a
que haxa alumnado que acabe por carecer de formación artística, fundamental na
formación académica de nenos e nenas, e necesaria para que poida realizar no
futuro a elección máis atinada sobre a súa formación postobrigatoria. Por iso,
consideramos que a Consellaría debería apostar polas materias deste área, continuando
coa súa impartición en todos os centros e garantindo así que todo o alumnado
reciba esta formación e que todos os centros conten co profesorado necesario
para impartila.
Por outro lado, consideramos inadecuada e excesiva a implantación da
materia de Iniciación á Actividade Emprendedora e Empresarial e por iso
solicitámoslle que non sexa impartida en Galiza. Do mesmo modo consideramos que
a Relixión non debe formar parte do currículo escolar e que a Consellaría
debería de potenciar a materia de Valores Sociais e Cívicos.
Trasladámoslle tamén a nosa preocupación pola falta de democracia na
xestións dos centros educativos coa implantación da LOMCE. O Consello
Escolar, en que está representada toda a comunidade educativa, deixará de ser
un órgano de goberno e de decisión na elección da dirección do centro, pois
malia que unha representación deste órgano formará parte da Comisión
seleccionadora esta quedará invalidada desde o momento que a Administración se reserva
para si máis do 50% da representación, o que pode dar lugar a que un director
ou directora sexa elixido só pola Administración sen ter en conta a posición do
resto dos integrantes da Comisión. É por iso que lle solicitamos que o director
ou directora sexa elixido directamente polo Consello Escolar e non mediante
concurso de méritos, ou polo menos que ceda a súa representación nas comisións
de selección de directoras e directores para que estes resulten electos co
apoio maioritario do Consello Escolar.
Por outra parte, sería unha imprudencia e unha desconsideración co
conxunto da comunidade educativa pretender aplicar a LOMCE no vindeiro curso,
pois até agora nin sequera se negociaron nin se coñecen os currículos e as
consecuencias organizativas que comportarán nos centros. Por iso, reclamámoslle
que non se impoña, unha vez máis, a improvisación e que non se aplique a
LOMCE para o curso 2014-2015.
Como
Plataforma Galega en Defensa do Ensino Público dirixirémonos aos centros para
expresarlles esta posición e trasladarlles a idoneidade de non modificar os
libros de texto, de facilitar a súa gratuidade para todo o alumnado e de
potenciar as materias de Educación Artística e Valores Sociais e Cívicos, que
sexa o Consello Escolar o que elixa a dirección dos centros educativos e que
non se aplique a LOMCE para o vindeiro curso.
Finalmente, queremos trasladarlle tamén a nosa preocupación pola entrada
en vigor da Lei de reforma da administración local e as repercusións que
esta pode ter na oferta de servizos no ensino. Consideramos que os servizos
complementarios e as actividades extraescolares deberían ser ofertadas gratuitamente
en todos os centros pola propia Consellaría, mediante xestión directa e persoal
específico. Nese sentido, solicitaremos que se faga cargo de todos eles. Mais,
mentres esta petición non se efectiviza, solicitamos que non se vexa minguada a
actual oferta de servizos e actividades, que nalgúns casos están sustentadas
polos concellos.
Agardando que atenda as nosas peticións, saúdano atentamente
---------------------------------------------------------------------------------------------------------------------------- SR. CONSELLEIRO DE CULTURA,
EDUCACIÓN E ORDENACIÓN UNIVERSITARIA:
A Plataforma Galega en Defensa do Ensino
Público, unha vez aprobada
a Lei de reforma da administración local e debido a incidencia que esta lei
pode ter nos servizos que os concellos prestan nos e aos centros educativos,
Solicita
- Que a Consellaría se faga responsábel e estenda a todos os centros educativos os servizos complementarios, as actividades extraescolares e o transporte onde sexa necesario, e que estes servizos e actividades sexan gratuítos.
- Que se manteñan, como mínimo, os actuais servizos e oferta de actividades extraescolares e que esta modificación de Lei non repercuta nos mesmos e na oferta que recibe o alumnado.
Santiago de Compostela, 3 de abril de 2014
